افضل كتاب يشرح كيف تحفظ القران بسهوله ويسر

رابط الكتاب هوووووووو


https://www.box.com/s/bxid9di74q8y8jzftugu

طريقة مميزة جدًا لحفظ القرآن من الأستاذ المقرئ أخي عمر علي كامل وفقه الله..

عايز أحفظ القرآن بس كل ما أحفظ أي آيات أنساها..!!

هقولك بطريقة بسيطة ومن غير استعجال خالص، فات كام سنة وأنت ما حفظتش؟!! طيب خد الطريقة دي وبراحتك تماما وقليل دائم خير من كثير منقطع...

هنحفظ 5آيات بس كل 3أيام
بس ال 5 آيات اللي تحفظهم هتكررهم في اليوم ده 4 مرات في الصلوات السرية، 46 مرة تانية ما بين الصلوات وعلى مدار اليوم بحيث يكون إجمالي أول يوم 50 مرة تكرار، مش هياخدوا وقت على فكرة
بالنسبة للنساء هتكرريهم 10 مرات في الخمس صلوات الفروض، و 40 مرة في بقية اليوم...
اليومين التانيين هنكررهم في الصلوات برضه، وفي كل الأوقات بعدد لا يقل عن 25 مرة...
هتلاقي نفسك أول اليوم الرابع كررت ال 5 آيات 100 مرة، فهتاخد ال 5 آيات الجدد، بنفس الشكل في الصلوات أول يوم، وال 5 الماضية هتكررهم آخر 10 مرات بس مع ال 5 الجدد ...
وبعدين اليومين اللي بعدهم هتكرر ال 10 آيات مع بعض برضه 25 و 25 ...
وكل ما تجمع 5 آيات جديدة تضيفهم للآيات اللي قبلهم وهكذا لغاية ما تقفل الجزء الأول هتلاقي نفسك بتقرؤه كله من حفظك في نصف ساعة بالكتير لإنك كررت الآيات بعدد كبير جدا في الفترة دي وهتلاقي اللي حفظته زيه زي الفاتحة...

كل 3 أيام = 5 آيات يعني مالكش حجة

بس أنا كده هختم كمان 20 سنة
أولا أحسن من إنك ما تحفظش خالص
ثانيا احسبها كده
6236÷5 × 3 ÷30 ÷ 12 = 10 سنين و 3 شهور

ده لو 5 آيات مش بتزيد ولا بتنقص حتى مع قصار السور، وتحت أي ظرف وبراحتنا كل 3 أيام 5 آيات جدد...
تخيل لو خليتهم بعد شهرين مثلا 10 آيات كل 3 أيام وبقت المدة = النصف
شوية وزدنا خليناهم 20 يعني ممكن تلاقي نفسك في الآخر ختمت بعد 3 سنين أو 4 بإتقان ومراجعة أحسن من احسن واحد حفظ في 3 شهور أو 6 شهور أو سنة ولسا هيبدأ يراجع...

تعرف تبدأ من دلوقتي؟
طيب تعرف تكسب ثواب في والدك ووالدتك وتحفظهم معاك الزهراوين على الأقل (البقرة وآل عمران) عشان يحاجان عنهما يوم القيامة؟!!!
مش هيتعبوا ولا أنت هتتعب 6 شهور بالكتير هيكونوا خلصوا البقرة إن شاء الله و4 شهور آل عمران يا سيدي قول سنة، واعتبره من البر اللي أنت ناسيه بقالك زمن

أنت لسا قاعد؟!!!

وعندكم جداول في ال Notes هتنفعكم إن شاء الله للي حفظ ونسي أو حفظ شوية وتوقف ...أو لسا هيبدأ حفظ على نفس الطريقة دي واللي يعرف يسرع عن كده ويزود الكمية اللي هيحفظها كل 3 أيام يزود بشرطين:
قليل دائم خير من كثير منقطع
زود الكمية زي ما تحب لكن ما تقللش عدد الأيام يعني ما تحفظش كل يوم 5 آيات واحفظ 15 آية كل 3 أيام لو تقدر...
لازم يكون فيه يومين مراجعة بس وتحسبا لأي ظرف ممكن يحصل وكمان على ما الذاكرة الدائمة تستوعب اللي أنت حفظته وإنها مطالبة باستحضار المحفوظ ده في أي وقت، تمام كده؟!!!

يلا مستني أول واحد يقولي ختمت البقرة والحمد لله
ودمتم بخير
ملحوظة:
لا شك أن ضبط الحفظ والقراءة على يد شيخ أو شيخة هو المقدم والأولى فليبحث كل واحد منا عن شيخ قريب منه يصحح له القراءة ويضبط له احكام التجويد فإن عدم ذلك -مؤقتا- لأي ظرف طاريء فلا اقل من ضبط القراءة أولا بسماعها من الشيخ الحصري خاصة، وقراء الإذاعة المصرية الخمسة الكبار عامة ولا أزيد عليهم احدا، لضبط الآيات وأحكامها إلى أن ييسر الله الانتظام في سلك التلقي على أيدي الشيوخ والإجازة...والله ولي التوفيق